Historie & Verein

Dem Zuagroastn Karl Arnold is 1908 a varuckte Idee kemma: ois Karikaturist und umgebm vo lauta Künstla hoda se de Vorstod-Hoazat ausdenkt. Zamad mid seine Künstlerspezln hoda des erste Festl ausgricht und si ebbs obgschaud bei de Brelltbühna in da ganzn Stod. In de zwanzga Jar dann erstmoi gar wordn und es hod bis 1951 dauerd, dass wieda aa Vorstod-Hoazat gmacht worn is. Aa wenns erst a Faschingsgaudi war, so derma jetz jeds Jahr zwischn April und Mai feian. S’Festl is äfta moi umzogn, hod oiso scho in diverse Wirtshäusa stodgfundn. Oogfangt homs im „Arzberger Keller“ in da Nymphenburger Straß (den gibt’s leida nimma). Nachad hod des Spektakl im Gasthof „Zum Franziskaner über der Klause“ z’Harlaching sei Hoamad ghabt und späda im Hofbräukeller am Wiener Platz. Heidzdog derma im Hofbräuhaus am Platzl feiern – do is de Hoazat aa scho in de 70er Jar gwen.

Unsa deazeitiga Virstand is da Leiss-Huber Anton, den ma vo de „Brettl-Spitzen“ und am „Schleudergang“ ausm Bayerischen Fernsehn kennd und dea aa Krimis schreibd. Er werd a bissal ebbs neis bei da Vorstod-Hoazat brawiern. Dassa koan rechtn Schindluada dreibt mid dera Tradition, helfan eam d’Bettina von Haken („die Primatonne“), Markus Feiersinger, Dorothea Hutterer und da Martin Oser.

Und mei, wos scho Leid bei dera Hoazat dabei warn in de letztn Jahrzehnta, des ged auf koa Kuahaud ned. Aba a paar homma eich do no zamgschriebm:

Ludwig Thoma (Autor)
Liesl Karlstadt (Schauspielerin)
Rudolph Mooshammer (Modedesigner)
Hansi Kraus (Schauspieler)
Gerd Lohmeyer (Schauspieler)
Gilbert von Sohlern (Schauspieler)
Conny Glogger (BR Moderatorin „Die Stimme Bayerns“)
Ilse Neubauer (Schauspielerin)
Brigitte Walbrun (Schauspielerin)
Ina Meling (Schauspielerin)
Maxi Schafroth (Kabarettist)
Ilse Aigner (Staatsministerin)
Jürgen Kirner (Kabarettist)
Kathrin Anna Stahl (Schauspielerin)
Florian Odendahl (Schauspieler)
Josef Schmid (2. Bürgermeister der Stadt München)
Patrick Lindner (Schlagersänger)
Luitpold Prinz von Bayern (Unternehmer)
Marianne und Michael (Schlagersänger)
Ferdinand Schmidt-Modrow (Schauspieler)
Simon Pearce (Comedian)
Veronika von Quast (Schauspielerin)
Monika Baumgartner (Schauspielerin)
Sepp Schauer (Schauspieler)
Winfried Frey (Schauspieler)
Eisi Gulp (Schauspieler)
Nick McCarthy (Sänger der Band „Franz Ferdinand“)
u.v.a.